ԴԻՏԱՐԿՈՒՄ ԿԵՆՏՐՈՆԱԱՍԻԱԿԱՆ ԷՆԵՐԳԵՏԻԿ ԶԱՐԳԱՑՈՒՄՆԵՐԻ ՎԵՐԱԲԵՐՅԱԼ Կենտրոնական Ասիայի նոր վերաձևո՞ւմ
![Руский](/images/rus_f.png)
Նախորդ մի քանի շաբաթների ընթացքում Կենտրոնական Ասիայում տեղի ունեցան երկու ուշագրավ իրադարձություններ։ Թեև առաջին հայացքից այդ իրադարձություններն էական նշանակություն չունեն տարածաշրջանի էներգետիկ փոխդասավորվածության առումով, սակայն երկու իրադարձությունների դիտարկումն էլ հիմք է տալիս ենթադրելու, որ, թերևս, մենք գտնվում ենք էներգետիկ նոր պայմանավորվածությունների նախաշեմին։
Ուզբեկստանի քայլը
Ս.թ. նոյեմբերի 12-ին հայտնի դարձավ, որ Ուզբեկստանը դիմում է ներկայացրել «Եվրասիական տնտեսական ընկերակցության» (ЕвразЭС) քարտուղարություն՝ կազմակերպությունից դուրս գալու մասին։ Թեև ռուսական աղբյուրների ներկայացմամբ, պաշտոնական Տաշքենդի նման քայլը որևէ ազդեցություն չի ունենա ռուս-ուզբեկական էներգետիկ պայմանավորվածությունների վրա1, իրականում Ուզբեկստանի այդ քայլն առնվազն նշանակում է, որ՝
- Որոշումն ունի ռազմավարական բնույթ։ Այսինքն՝ Տաշքենդում խնդիր է դրված փոփոխություններ մտցնել արտաքին քաղաքականության մեջ, իսկ Ուզբեկստանի պարագայում ու հատկապես Ռուսաստանի հետ հարաբերությունների համատեքստում էներգետիկ բաղկացուցիչը ուզբեկական արտաքին քաղաքականության առաջնային կետերից մեկն է։ Հետևաբար, չպետք է բացառել, որ առաջիկայում մենք նորություններ կլսենք ռուս-ուզբեկական էներգետիկ համագործակցության վերաբերյալ։
- Մյուս կողմից, եթե ներկայացվածը համապատասխանում է իրականությանը, ապա դժվար թե նորությունները կանգ առնեն միայն այդ կետի վրա։ «Եվրասիական տնտեսական ընկերակցությունից» Ուզբեկստանի դուրս գալը կարող է ցուցիչ հանդիսանալ, որ Տաշքենդում ձեռնամուխ կլինեն ռուսականից զատ այլ ուղղություններով էներգետիկ ռազմավարությունների իրականացմանը, եթե, իհարկե, այդ նպատակով արդեն քայլեր ձեռնարկված չեն։
- Եվ վերջապես, հաշվի առնելով Ուզբեկստանի աշխարհառազմավարական դիրքը և Թուրքմենստանի ու Տաջիկստանի հաղորդակցային կախվածությունը Տաշքենդից՝ հարկ է ենթադրել, որ փոփոխություններն Ուզբեկստանի արտաքին դիրքորոշման մեջ կարող են ազդեցություն ունենալ նաև այդ երկու երկրների վրա։
Ընդհանուր հետևությունն այս է. Կենտրոնական Ասիայում առանցքային երկիր հանդիսացող Ուզբեկստանի նման կտրուկ քայլը կարող է նշանակել, որ ենթադրվող փոփոխությունները կրելու են տարածաշրջանային բնույթ և չեն սահմանափակվի միայն Տաշքենդով (ինչպես 2005թ. Անդիջանի դեպքերին հաջորդող ժամանակահատվածում)։
Թուրքմենստանի հայտը
Ս.թ. հոկտեմբերի 14-ին բրիտանական «Gaffney, Cline & Associates Ltd.» ընկերությունը հրապարակեց թուրքմենական բնական գազի հանքերի՝ իր կողմից իրականացված աուդիտի արդյունքները2։ Համաձայն այդ հրապարակման՝ միայն «Յոլոտան-Օսման» գազահանքի պաշարները գնահատվեցին 5 տրլն մ3-ից մինչև 17.5 տրլն մ3, իսկ Թուրքմենստանի բնական գազի ընդհանուր պաշարները գնահատվեցին ավելի քան 27.67 տրլն մ3։ Եթե բրիտանական այդ ընկերության ներկայացրած տվյալները համապատասխանում են իրականությանը, ապա Թուրքմենստանը դառնում է աշխարհում բնական գազի ամենամեծ պաշարներն ունեցող երկրորդ երկիրը Ռուսաստանից հետո։
Բնական գազի ամենամեծ պաշարներն ունեցող առաջին հինգ երկրները3 | |||
№ | երկիր | պաշարները, տրլն մ3 | չափաբաժինը (%)
մոլորակի ընդհանուր պաշարների մեջ |
1. | Ռուսաստան | 44.60 | 22.07% |
2. | Թուրքմենստան | 27.67 | 13.69% |
3. | Իրան | 27.58 | 13.65% |
4. | Կատար | 25.64 | 12.69% |
5. | Սաուդյան Արաբիա | 7.07 | 3.50% |
Սակայն հասկանալի է` հարցը չի փակվում սոսկ Թուրքմենստանի զբաղեցրած դիրքի փոփոխությամբ։ Թուրքմենստանի բնական գազի պաշարների նման կտրուկ աճն4 իր հետ կբերի ոչ միայն շոշափելի տեղաշարժեր տարածաշրջանային էներգետիկ պատկերում, այլև կարող է հանգեցնել աշխարհաքաղաքական հետևանքների։
Պատահական չէ, որ միայն հոկտեմբերին Աշգաբադ այցելեցին Թուրքիայի վարչապետ Ռեջեփ Թայիփ Էրդողանը, «Nabucco» նախագծի կոորդինատոր, Ավստրիայի հատուկ հարցերի գծով դեսպան Մարիա Ռեյխ-Ռոհրվիգը, ավստրիական նավթագազային խոշորագույն ընկերության՝ «OMV»-ի (որը «Nabucco» նախագծի իրականացման, թերևս, առանցքային ընկերությունն է) գլխավոր տնօրեն Վոլֆգանգ Ռուտենսդորֆերը, եվրասիական էներգետիկ հարցերով ԱՄՆ հատուկ ներկայացուցիչ Բոյդեն Գրեյը և ԱՄՆ պետքարտուղարության եվրասիական էներգետիկ հարցերի գծով կոորդինատոր Սթիվեն Մանը, ինչպես նաև Իրանի արտաքին գործերի ու նավթի նախարարներ Մանուչեհր Մոթաքին և Ղոլամհոսեյն Նոզարին5։
Թեև նոր էներգետիկ պայմանավորվածությունների մասին առայժմ հայտնի չէ, սակայն մի բան գրեթե հստակ է՝ միջազգային պրակտիկայում գազահանքերի աուդիտը (հատկապես՝ նման խոշոր աուդիտը) սովորաբար նախորդում է պայմանագրերի կնքմանը։
Քաղաքական տեսանկյունից Աշգաբադի որոշումը՝ հրապարակել նման կարգի տեղեկություն, պետք է ընկալել որպես հայտ՝ նոր դերակատարությամբ հանդես գալու միջազգային էներգետիկ շուկայում։ Որովհետև այս պարագայում առաջնային է դառնում ոչ թե Թուրքմենստանի բնական գազի իրական պաշարների հարցը, այլ այն թիվը, որը ներկայացվում է։ Այդ առումով իրավիճակը կարծես թե մոտ է Ադրբեջանի նավթային բումին նախորդող ժամանակահատվածին։ Մյուս կողմից, նման քանակությամբ բնական գազի պաշարների մասին հրապարակումը նաև յուրահատուկ մեսիջ է Մոսկվային, թե Աշգաբադն ունի ավելի շատ կապույտ վառելիք, քան պարտավոր է վաճառել «Газпром»-ին։ Այսինքն՝ ռուսական կողմի համար անակնկալ չպետք է լինի, եթե Թուրքմենստանը որոշի իր բնական գազը միջազգային շուկա արտահանել նաև այլ ուղիներով։
Եվ վերջապես, նույն համատեքստում պետք է դիտարկել սեպտեմբերի 26-ին Թուրքմենստանում նոր սահմանադրության ընդունման փաստը։ Այն, վերացնելով Սափարմուրադ Նիյազովի օրոք ստեղծված 2500 անդամ ունեցող Ժողովրդական խորհուրդը, ցուցիչ հանդիսացավ, որ նախագահ Բերդիմուհամեդովն իրեն բավական ամուր է զգում6։
Հեռանկարի շուրջ
Էներգետիկ քաղաքականությունը սկսում է գործել միայն այն ժամանակ, երբ առկա է էներգակիրների տեղափոխման ճանապարհը։ Այդ իմաստով միգուցե վաղ է խոսել կենտրոնաասիական էներգետիկ դաշտում ենթադրվող փոփոխությունների մասին, սակայն Ուզբեկստանին և Թուրքմենստանին առնչվող վերոհիշյալ իրադարձությունները հիմք են տալիս ենթադրելու, որ նորություններ, այնուամենայնիվ, կլսենք։ Այն, որ դրանք դժվար թե առնչվեն չինական ուղղությանը, վկայում է այն հանգամանքը, որ Կենտրոնական Ասիան Չինաստանին կապող նավթամուղի ու գազամուղի շինարարություններն ավարտական փուլում են։ Հետևաբար, միակ տարբերակը մնում է արևմտյան ուղղությունը։ Այլ հարց է, թե ի վերջո որ ճանապարհը կընտրվի՝ ադրբեջանակա՞ն, իրանակա՞ն, թե՞ երկուսը միասին։
1Հայտնի է, որ ներկայում Ուզբեկստանն իր բնական գազը վաճառում է միայն Ռուսաստանին։ Սեպտեմբերի սկզբին Տաշքենդ Ռուսաստանի վարչապետ Վլադիմիր Պուտինի կատարած այցելության ընթացքում պայմանավորվածություն ձեռք բերվեց նոր գազամուղի կառուցման վերաբերյալ, որը դեպի Ռուսաստան հոսող նաև ուզբեկական կապույտ վառելիքը տարեկան կավելացնի 25-30 մլրդ մ3։ Հայտնի է նաև, որ եվրոպական սպառողների առջև իր պարտավորությունները կատարելու համար «Газпром»-ին ուղղակի անհրաժեշտ է կենտրոնաասիական երեք պետություններից (Ղազախստան, Ուզբեկստան, Թուրքմենստան) եկող բնական գազը, այլապես միայն ռուսական կապույտ վառելիքով «Газпром»-ը չի կարողանա բավարարել ներքին պահանջները և անհրաժեշտ քանակությամբ գազ արտահանել Եվրոպա։
2Նշենք, որ 2008թ. մարտի 28-ին հրապարակված տեղեկության համաձայն՝ թուրքմենական կառավարությունը բրիտանական «Gaffney, Cline & Associates Ltd.» ընկերությանն էր հանձնարարել իրականացնել Թուրքմենստանի բնական գազի հանքերի առաջին անկախ աուդիտը` պարզելու երկրի կապույտ վառելիքի իրական ծավալները։ Նման աուդիտ չէր անցկացվել Թուրքմենստանի անկախությունից ի վեր։
3Տվյալները ներկայացված են՝ հիմք ընդունելով «Gaffney, Cline & Associates Ltd.» ընկերության նշված հրապարակումը և «British Petroleum» ընկերության կողմից պատրաստված «BP Statistical Review of World Energy, June 2008» զեկույցը։
4«BP Statistical Review of World Energy, June 2008» զեկույցը Թուրքմենստանի բնական գազի պաշարները գնահատում է 2.67 տրլն մ3։
5Նույն շարքին են դասվում նաև ս.թ. նոյեմբերի 14-ին Բեռլինում կայացած Գերմանիայի կանցլեր Անգելա Մերկելի և Թուրքմենստանի նախագահ Գուրբանգուլի Բերդիմուհամեդովի բանակցությունները։
6Ուշագրավ է, որ նոր սահմանադրության ընդունման նախօրեին՝ սեպտեմբերի 12-14-ը, Աշգաբադի հյուսիսային արվարձանում տեղի ունեցան բախումներ անհայտ զինյալների և թուրքմենական անվտանգության մարմինների միջև, որոնց հետևանքով զոհվեցին անվտանգության 20 աշխատակիցներ։
դեպի ետ
Հեղինակի այլ նյութեր
- ՌՈՒՍԱՍՏԱՆ–ԹՈՒՐՔԻԱ ՀԱՐԱԲԵՐՈՒԹՅՈՒՆՆԵՐԻ ՇՈՒՐՋ[10.07.2009]
- ԹՈՒՐՔԻԱ. ԷՆԵՐԳԵՏԻԿ ՄԻՋԱԶԳԱՅԻՆ ՀԱՆԳՈՒՅՑ ԴԱՌՆԱԼՈՒ ՀԵՌԱՆԿԱՐԸ [19.03.2009]
- ԹՈՒՐՔԻԱ. ԷՆԵՐԳԵՏԻԿ ԶԱՐԳԱՑՈՒՄՆԵՐԻ ՔԱՂԱՔԱԿԱՆ ՀԱՄԱՏԵՔՍՏԸ [05.03.2009]
- ԱՄԵՐԻԿԱ-ԻՐԱՆԱԿԱՆ ՀԱՐԱԲԵՐՈՒԹՅՈՒՆՆԵՐԻ ՀԵՌԱՆԿԱՐԻ ՇՈՒՐՋ [02.02.2009]
- ՀԵՏԽՈՐՀՐԴԱՅԻՆ ԱՐԵԱՅՈՒՄ ՌՈՒՍԱՍՏԱՆԻ ՔԱՂԱՔԱԿԱՆՈՒԹՅԱՆ ՇՈՒՐՋ[22.01.2009]
- ԹՈՒՐՔՄԵՆՍՏԱՆՆ ԱՐԵՎՄՈՒՏՔԻ ՀԵՏ ԷՆԵՐԳԵՏԻԿ ՊԱՅՄԱՆԱՎՈՐՎԱԾՈՒԹՅԱՆ ՆԱԽՕՐԵԻ՞Ն[27.12.2008]
- ԼՂՀ ՀԻՄՆԱԽՆԴՐԻ ՇՈՒՐՋ. «ԱԴՐԲԵՋԱՆԱԿԱՆ ՀԱՐՑԸ» [27.11.2008]
- ԱԴՐԲԵՋԱՆԸ ՆՈՐ ԸՆՏՐՈՒԹՅԱՆ ՇԵՄԻՆ[03.11.2008]
- ԻՐԱՆՆ ԱՐԵՎՄՈՒՏՔԻ ՀԵՏ ԷՆԵՐԳԵՏԻԿ ՀԱՄԱՁԱՅՆՈՒԹՅԱՆ ՆԱԽՕՐԵԻՆ[27.10.2008]
- ԻՐԱՎԻՃԱԿԻ ՓՈՓՈԽՈՒԹՅՈՒՆ ՀԱՐԱՎԱՅԻՆ ԿՈՎԿԱՍՈՒՄ[18.09.2008]