ՍՈՑԻԱԼԱԿԱՆ ՑԱՆՑԵՐԸ ՀԱՅԱՍՏԱՆՈՒՄ (2015թ. տվյալները)

09.07.2015

ՍՈՑԻԱԼԱԿԱՆ ՑԱՆՑԵՐԸ ՀԱՅԱՍՏԱՆՈՒՄ (2015թ. տվյալները)

Սամվել Մարտիրոսյան
«Նորավանք» ԳԿՀ Տեղեկատվական կենտրոնի փորձագետ

Սոցիալական ցանցերը Հայաստանում շարունակում են զարգանալ։ Դրանց այցելուների թվաքանակը շարունակում է աճել, ազդեցությունը հասարակական կյանքի, տեղեկատվական հոսքերի վրա նույնպես մեծանում է։ Մյուս կողմից՝ հավանական է թվում, որ Հայաստանը մոտենում է հագեցման կետին։

Հայաստանում ամենից շատ այցելվող սոցիալական ցանցը շարունակում է մնալ ռուսաստանյան Odnoklassniki.ru հարթակը։ Այստեղ ամսական կտրվածքով այցելուների թվաքանակը տատանվում է 900 000 - 1 000 000-ի միջև (տե՛ս Նկար 1)։ Գրաֆիկից կարելի է դատել, որ կայքը հասել է առավելագույն կետին՝ ներգրավելով ինտերնետ կապից օգտվողների մեծամասնությանը, հաշվի առնելով, որ ըստ վերջին պաշտոնական տվյալների՝ Հայաստանում ինտերնետից օգտվողների թիվը 2014թ. տվյալներով հասել է բնակչության 50%-ին¹։

Facebook ցանցն այցելություններով մոտենում է Odnoklassniki.ru-ին, սակայն դեռևս շարունակում է մնալ թիվ երկու հարթակը Հայաստանում։ Ըստ Facebook-ի գովազդային համակարգի տվյալների՝ հայաստանցի ակտիվ օգտատերերի թվաքանակն ամսական կտրվածքով հասնում է արդեն 800.000-ի։ Սակայն այստեղ օգտատերերի աճի դինամիկան նվազել է։ Այսպես, 2014թ. դեկտեմբերին ցանցում հայաստանցի օգտատերերի թիվը հասնում էր 740.000-ի²։ Եվ եթե հոկտեմբերից դեկտեմբեր, երկու ամիսների ընթացքում էր արձանագրվել 60.000 օգտատերերի աճ, ապա նույն աճը դիտվել է արդեն 2014թ. դեկտեմբերից մինչև 2015թ. հունիս ժամանակահատվածում (արդեն վեց ամսվա ընթացքում)։ Ակնհայտորեն Facebook-ը նույնպես մոտենում է իր առավելագույնին։

Այլ սոցիալական ցանցերը չեն տալիս հստակ տվյալներ Հայաստանից այցելուների քանակի վերաբերյալ։ Սակայն կարելի է տալ մոտավոր գնահատականներ։ Ակնհայտ է, որ Youtube-ը հանդիսանում է ամենատարածված սոցիալական հարթակներից մեկը Հայաստանում (չնայած օգտատերերի մեծ մասը պասիվ դիտորդներ են և չեն տեղադրում սեփական տեսանյութեր կամ չեն կատարում մեկնաբանություններ)։ Ըստ երկու հիմնական միջազգային հարթակների, որոնք կատարում են կայքերի այցելությունների մոտավոր հաշվարկներ (ըստ Similarweb-ի³ և Alexa-ի⁴) Youtube-ը Հայաստանից այցելությունների քանակով զբաղեցնում է երրորդ տեղը։

Կողմնակի տվյալներից դատելով՝ շարժական հավելվածների համար ստեղծված Instagram սոցիալական ցանցը նույնպես Հայաստանում արագ է զարգանում։ Սակայն այս հարթակը դեռ չունի, օրինակ, հասարակական այն ազդեցությունը, որն ակնհայտորեն ունեն Հայաստանում Facebook-ը և Youtube-ը։

Վերջին տարիներին Հայաստանում նկատվում է նաև այցելությունների անկում այն սոցիալական հարթակներում, որտեղ կարևորվում է բովանդակային մասը։ Այսպես, վերջին տարիներին գրեթե զրոյի է հասել հայաստանյան ակտիվությունը Livejournal.com բլոգային սոցիալական ցանցում, որն ամենից շատ այցելվողներից էր 2007-2010թթ.։ Այս հարթակն ավելի շատ հայտնի էր որպես հասարակական, քաղաքական բովանդակության ստեղծման հարթակ ԱՊՀ երկրներում, ինչպես նաև Հայաստանում։ Ռուսաստանի Դաշնությունում, օրինակ, այն շարունակում է մնալ բավական ակտիվ, և դրա լսարանը համեմատելի է նույն Facebook-ի ռուսաստանյան լսարանի հետ⁵ (տե՛ս Նկար 2).

Այսպիսով, սոցիալական ցանցերի աճը Հայաստանում շարունակվում է։ Մյուս կողմից, լսարաններն արդեն մոտենում են հագեցման՝ մոտենում են Հայաստանի ընդհանուր օգտատերերի թվին։ Չնայած 2014թ., ըստ պաշտոնական տվյալների, արձանագրվել է ինտերնետից օգտվողների 9,4% աճ, սակայն սպասել «պայթյունային» աճի սոցիալական ցանցերում, ինչպիսին էր իրավիճակը դեռ երեք-չորս տարի առաջ, չի կարելի⁶։

¹ Армения занимает 74 место среди 166 стран мира по развитию ИКТ и 9 место по покрытию сел 3G-сетью - http://telecom.arka.am/ru/news/analytics/armeniya_zanimaet_74_mesto_-sredi_166_stran_mira_po_razvitiyu_ikt_i_9_mesto_po_pokrytiyu_sel_3g_setyu/

² Social Media in Armenia, December 2014, http://www.banman.am/2014/12/social-media-in-armenia-december-2014.html

⁴ http://www.alexa.com/topsites/countries/AM

⁵ Социальные сети в России, весна 2015. Цифры, тренды, прогнозы, http://habrahabr.ru/company/palitrumlab/blog/259903/

⁶ Армения занимает 74 место среди 166 стран мира по развитию ИКТ и 9 место по покрытию сел 3G-сетью. http://telecom.arka.am/ru/news/analytics/armeniya_zanimaet_74_mesto_sredi_166_stran_mira_po_razvitiyu_ikt_i_9_mesto_po_pokrytiyu_sel_3g_setyu/

դեպի ետ

Հեղինակի այլ նյութեր