• am
  • ru
  • en
Версия для печати
11.02.2015

«ԳԼՈԲԱԼ ՆՈՐԱՐԱՐՈՒԹՅԱՆ ԻՆԴԵՔՍ 2014Թ.» ԶԵԿՈՒՅՑԸ

   

(The Global Innovation Index 2014)

Կարեն Վերանյան
«Նորավանք» ԳԿՀ Քաղաքական հետազոտությունների կենտրոնի ավագ փորձագետ

2014թ. հրապարակվեց Քորնել համալսարանի (Cornell University), INSEAD գործարարության դպրոցի և Մտավոր սեփականության համաշխարհային կազմակերպության (The World Intellectual Property Organization) պատրաստած «Գլոբալ նորարարության ինդեքս 2014թ.» զեկույցը։ Զեկույցում կարևորվում են համաշխարհային նորարարության պոտենցիալն ու ընթացիկ ձեռքբերումները՝ որպես տարբեր երկրների տնտեսությունների շարժիչ ուժ և մարդկության բարեկեցության ապահովման գրավական։ Ինչպես վստահեցնում են զեկույցի կազմակերպիչները և հեղինակները, հետազոտության կանխատեսումներն ու գնահատականները հնարավորություն են տալիս առավել խորքային մոտեցումներով ընկալել ներկայիս համաշխարհային նորարարության միտումները և հեռանկարները։ Զեկույցի նպատակն է աջակցել տարբեր երկրների քաղաքական որոշումներ կայացնող գործիչներին ու գործարար շրջանակների ղեկավարներին առավել ճկուն և համատեղ քաղաքականություն որդեգրել համաշխարհային նորարարության պոտենցիալի զարգացման ուղղությամբ1։

«Գլոբալ նորարարության ինդեքս 2014թ.» զեկույցը վարկանիշավորում է աշխարհի շուրջ 143 երկրների տնտեսությունների նորարարական պոտենցիալը։ Զեկույցի մեթոդաբանությունում կիրառվել է 81 չափորոշիչ։ Երկրների նորարարության վարկանիշավորումն իրականացվում է 0-100 միավորների սանդղակի դասակարգման համաձայն, որտեղ բարձրագույն արդյունքը բնորոշում է տվյալ երկրի նորարարության բարձր պոտենցիալը, ցածրագույն միավորը՝ երկրի նորարարական պոտենցիալի ցածր ցուցանիշը։

Աղյուսակ 1. Գլոբալ նորարարության ինդեքս 2014թ., Հայաստան և այլ երկրներ


Աղբյուրը՝ http://www.uis.unesco.org/Library/Documents/global-innovation-index-2014-human-factor-in-innovation-en.pdf

«Գլոբալ նորարարության ինդեքս 2014թ.» վարկանիշային հետազոտությունում լավագույն ցուցանիշը Շվեյցարիայինն է՝ 64,78 ամփոփ միավորով, որին հաջորդում են Մեծ Բրիտանիան և Շվեդիան։ Միացյալ Նահանգները զբաղեցնում է ցուցակի 6-րդ հորիզոնականը՝ 1 դիրքային միավորով առաջ անցնելով Սինգապուրից։ Երկրների ցուցակի լավագույն տասնյակը եզրափակում է Հոնկոնգը՝ ունենալով 56,82 ամփոփ միավոր։

ԱՊՀ անդամ երկրների շարքից առաջատարը Մոլդովան է, որ գտնվում էր 43-րդ հորիզոնականում՝ 40,74 ամփոփ միավորով։ Ի դեպ, Մոլդովան նորարարության արդյունավետության ցուցչով զեկույցի 143 պետությունների շարքում հանդիսանում է լավագույն արդյունք արձանագրած երկիրը՝ 1,07 միավորով։ ԱՊՀ երկրներից հաջորդաբար բարձր են նաև Ռուսաստանի (49-րդ դիրք), Բելառուսի (58-րդ դիրք) և Ուկրաինայի (63-րդ դիրք) ցուցանիշները։ ԱՊՀ տարածքում Հայաստանը զբաղեցնում է 5-րդ հորիզոնականը՝ 65-րդ դիրք 143 երկրների ցանկում (36,06 ամփոփ միավորով)։ Նորարարության արդյունավետության ցուցչով Հայաստանն արձանագրել է բավական բարձր արդյունք՝ 0,83 միավորով 143 երկրների շարքում զբաղեցնելով 28-րդ դիրքը։ Ի դեպ, Հայաստանը նորարարության պոտենցիալի վարկանիշով, ըստ զեկույցի գնահատականների, լավագույնն է Հարավային Կովկասի երկրների շարքում։ Վրաստանը 34,53 ամփոփ միավորով զբաղեցնում է 74-րդ դիրքը։ Տարածաշրջանի երկրներից ցածրագույն արդյունքը Ադրբեջանինն է, որը 143 պետությունների ցանկում զբաղեցրել է բավական ցածր դիրք՝ 101։ Ընդ որում, նորարարության արդյունավետության ցուցչով նույնպես Հայաստանն առաջատարն է Հարավային Կովկասում2։

1 The Global Innovation Index 2014. http://www.uis.unesco.org/Library/Documents/global-innovation-index-2014-human-factor-in-innovation-en.pdf

2 The Global Innovation Index 2014. http://www.uis.unesco.org/Library/Documents/global-innovation-index-2014-human-factor-in-innovation-en.pdf


«Գլոբուս» վերլուծական հանդես, թիվ 1, 2015

դեպի ետ
Հեղինակի այլ նյութեր