ԲԱՑԻ ՀՀ-ԻՑ, ՆԱԽԱՏԵՍՎՈՒՄ Է ՆԱԵՎ ՊՈՒՏԻՆԻ ԱՅՑԸ ԱԴՐԲԵՋԱՆ, ՌՈՒՍԱԿԱՆ ԿՈՂՄԸ ԱԿՏԻՎԱՑՆՈՒՄ Է ԻՐ ՄԻՋՆՈՐԴԱԿԱՆ ԱՌԱՔԵԼՈՒԹՅՈՒՆԸ ԱՐՑԱԽՅԱՆ ՈՒՂՂՈՒԹՅԱՄԲ. ՓՈՐՁԱԳԵՏ

17.09.2018

ԲԱՑԻ ՀՀ-ԻՑ, ՆԱԽԱՏԵՍՎՈՒՄ Է ՆԱԵՎ ՊՈՒՏԻՆԻ ԱՅՑԸ ԱԴՐԲԵՋԱՆ, ՌՈՒՍԱԿԱՆ ԿՈՂՄԸ ԱԿՏԻՎԱՑՆՈՒՄ Է ԻՐ ՄԻՋՆՈՐԴԱԿԱՆ ԱՌԱՔԵԼՈՒԹՅՈՒՆԸ ԱՐՑԱԽՅԱՆ ՈՒՂՂՈՒԹՅԱՄԲ. ՓՈՐՁԱԳԵՏ

13.09.18

Ռուսաստանի Դաշնության նախագահ Վլադիմիր Պուտինի կողմից Հայաստանի վարչապետ Նիկոլ Փաշինյանի հրավերն ընդունելը դիտարկվում է զուտ երկկողմ քաղաքական և դիվանագիտական հարաբերությունների օրինաչափության համատեքստում: Այս մասին Tert.am-ի հետ զրույցում ասաց «Նորավանք» հիմնադրամի Քաղաքական հետազոտությունների կենտրոնի ղեկավար, ավագ փորձագետ Կարեն Վերանյանը:

Նա նկատեց, որ երկկողմ այցելությունները, հանդիպումներն ու երկկողմ հետաքրքրություն ներկայացնող հարցերի շուրջ բանակցություններն այս փուլում, երբ փոխհարաբերություններում առկա են որոշակի անհամաձայնություններ, մեծ կարևորություն ունեն կողմերի համար:

«Ցանկանում եմ նշել այն հանգամանքը, որ այցը Հայաստան ռուսական կողմը դիտարկում է ոչ միայն երկկողմ հարաբերությունների համատեքստում, այլ այն կարևորվում է առաջին հերթին իր տարածաշրջանային նշանակությամբ:

Հիշեցնեմ, որ նախատեսվում է նաև Պուտինի այցելությունը Ադրբեջան: Ասել է թե, ռուսական կողմը ակտիվացնում է իր միջնորդական առաքելությունը հայ-ադրբեջանական և արցախյան ուղղությամբ: Նամանավանդ, երբ ներկայում պետք է ընթանան Ալիևի հետ Հայաստանի նոր իշխանությունների առաջին բանակցային գործընթացի նախապատրաստական աշխատանքները, որից հետո` արդեն բուն բանակցությունները»,- ասաց նա:

Ավելի վաղ հայտնել էինք, որ Ռուսաստանի Դաշնության նախագահ Վլադիմիր Պուտինը պաշտոնական այցով այցելելու է Հայաստան: Այդ մասին հայտնել էր ՌԴ նախագահի մամուլի քարտուղար Դմիտրի Պեսկովը։ «Ժամկետները կհստակեցվեն»,- ասել էր Պեսկովը՝ պատասխանելով ամսաթվի վերաբերյալ հարցին։

Ըստ Կարեն Վերանյանի՝ ռուսական կողմն այդ այցելություններով վերաճշգրտում է հիմնախնդրի կագավորման բանակցությունների այս փուլում կողմերի դիրքորոշումները:

«Եթե հարցին մոտենանք ավելի լայն` տարածաշրջանային ու միջազգային հարաբերությունների հարթությունից, ապա ռուսական կողմի համար էլ ավելի մեծ կարևորություն ունեն նման հանդիպումները, քանի որ Մոսկվան մոբիլիզացնում է գործընկեր պետությունների հետ քաղաքական, տնտեսական ռեսուրսները` դիմակայելու ամերիկյան տնտեսական պատժամիջոցներին: Այս տեսանկյունից պետք է ընդունել նաև սեպտեմբերի վերջերին նախատեսվող Պուտինի այցերը Միջին Ասիա»,- ասաց նա:

Վերադառնալով հայ-ռուսական հարաբերություններին և Պուտինի նախատեսվող այցին Հայաստան՝ փորձագետը նշեց, որ կարծում է՝ այցելության ընթացքում կողմերը կանդրադառնան երկկողմ հետաքրքրություն ներկայացնող հարցերի լայն սպեկտրին` երկկողմ հարաբերությունների քաղաքական, ռազմաքաղաքական տնտեսական հարցերից սկսած, մինչև տարածաշրջանային ու միջազգային ակտուալ խնդիրներ ու գործընթացներ: «Անշուշտ, հարաբերությունների զարգացման գործում կարևորվում են առկա որոշ քաղաքական անհամաձայնությունների շուրջ քննարկումները, որոնց ընթացքում հնարավոր կլինի գտնել դրանց լուծման ուղիները: Միևնույն ժամանակ, հարկավոր է հստակեցնել, որ այդ քաղաքական անհամաձայնությունները կրում են իրավիճակային բնույթ և չեն կարող ազդել երկու երկրների միջև ռազմավարական դաշնակցության տրամաբանության վրա»,- ասաց նա՝ հավելելով՝ կարելի է ենթադրել, որ հանդիպման ընթացքում կողմերը նախ կանդրադառնան առկա քաղաքական անհամաձայնություններին ու դրանց լուծման հնարավոր փոխշահավետ տարբերակներին:

Ըստ նրա՝ հանդիպմանը անդրադարձ կլինի երկու երկրների միջև ռազմաքաղաքական համագործակցության զարգացման հարցերին, այդ թվում և հարաբերություններին ՀԱՊԿ շրջանակներում, կշոշափվի նաև Սիրիայում հայկական կողմի հումանիտար առաքելության իրականացման հարցը:

«Օրակարգում, անշուշտ, դրված կլինեն արցախյան հիմնախնդրի կարգավորման գործընթացում բանակցություններին վերաբերող հարցեր: Կողմերը կքննարկեն նաև ԵԱՏՄ շրջանակներում փոխգործակցության և երկկողմ տնտեսական հարաբերությունների ակտուալ հարցեր` չբացառելով նաև դեպի Հայաստան բնական գազի մատակարարման գնի հետ կապված հարցը: Կարծում եմ՝ այդ այցը կլինի պրագմատիկ ու արդյունավետ երկու երկրների համար էլ»,- ասաց նա:

Հռիփսիմե Հովհաննիսյան

http://www.tert.am/am/news/2018/09/13/Karen-veranyan/2790357

դեպի ետ

Հեղինակի այլ նյութեր