09.06.2023ԱՍԱՆԺԸ ԿՕԳՏՎԻ ՎԵՐՋԻՆ ՀՆԱՐԱՎՈՐՈՒԹՅՈՒՆԻՑ՝ ԲՐԻՏԱՆԱԿԱՆ ԴԱՏԱՐԱՆԻ ՄԻՋՈՑՈՎ ՎԻՃԱՐԿԵԼՈՒ ԻՐ ԱՐՏԱՀԱՆՁՆՈՒՄՆ ԱՄՆ
WikiLeaks-ի հիմնադիր Ջուլիան Ասանժը կօգտվի վերջին հնարավորությունից՝ բրիտանական դատարանի միջոցով արգելափակելու իր արտահանձնումն ԱՄՆ։ Այս մասին հինգշաբթի օրն իր թվիթերյան էջում գրել է լրագրողի կինը՝ փաստաբան Ստելլա Ասանժը (Մորիս)։
«Հաջորդ շաբաթվա երեքշաբթի իմ ամուսին Ջուլիան Ասանժը նորացված դիմում կներկայացնի՝ բողոքարկելով Գերագույն դատարանում: Այնուհետև հարցը կանցնի Գերագույն դատարանի երկու նոր դատավորների առջև հրապարակային լսումների, և մենք լավատես ենք, որ կհաղթենք, և որ Ջուլիանը չի արտահանձնվի Միացյալ Նահանգներ, որտեղ նա կառերեսվի մեղադրանքների, որոնք կարող են հանգեցնել, որ նա իր մնացած կյանքը կանցկացնի խստագույն անվտանգության բանտում՝ ԱՄՆ կառավարության կողմից կատարված ռազմական հանցագործությունները բացահայտելու նպատակով իրական տեղեկատվություն հրապարակելու համար»,- գրել է Ստելլա Ասանժը։
Ավելի վաղ հայտնի էր դարձել, որ Լոնդոնի Գերագույն դատարանի դատավոր Ջոնաթան Սվիֆթը բոլոր ութ կետերով մերժել է Ասանժի փաստաբանների բողոքն ընդդեմ ավստրալացու արտահանձնման հրամանի։ Ասանժի պաշտպանական կողմը նոր վերաքննիչ բողոք ներկայացնելու հնարավորություն ունի մինչև հունիսի 13-ը։ Բացի այդ, Ասանժի արտահանձնումն ԱՄՆ կարող է արգելափակվել Մարդու իրավունքների եվրոպական դատարանի կողմից, որին նրա փաստաբանները դիմել էին անցյալ տարվա նոյեմբերին։
Ասանժը կալանավորվել ու տեղափոխվել է Լոնդոնի Բելմարշ բանտ այն բանից հետո, երբ 2019 թվականի ապրիլին նրան վտարել էին Մեծ Բրիտանիայի մայրաքաղաքում Էկվադորի դեսպանատան տարածքից։ Ավելի քան չորս տարի Վաշինգտոնը պահանջում է Լոնդոնի արտահանձնումը Միացյալ Նահանգներին, սակայն Ասանժի պաշտպանությունը ավելի ու ավելի շատ փորձում է կանխել դա:
Անցյալ տարվա հունիսին Միացյալ Թագավորության Ներքին գործերի այն ժամանակվա պետքարտուղար Պրիտի Պատելն իր հրամանով որոշել էր Ասանժին արտահանձնել Միացյալ Նահանգներին այն բանից հետո, երբ գործը քննվեց ինչպես Վեսթմինսթերի դատարանում, այնպես էլ Լոնդոնի Գերագույն դատարանում: Թագավորության ներքին գործերի նախարարությունը նշել էր, որ բրիտանական դատարանները չեն եկել այն եզրակացության, որ Ասանժի արտահանձնումը կլինի ռեպրեսիվ, անարդար կամ որ դատական ընթացակարգը կօգտագործվի անօրինական նպատակներով։ WikiLeaks-ը ավելի վաղ ընդգծել էր, որ ավստրալացու հետապնդումը միշտ էլ քաղաքական է եղել։
51-ամյա Ասանժը ԱՄՆ-ում մեղադրվում է ամերիկյան պատմության մեջ գաղտնի տեղեկատվության բացահայտման ամենամեծ դեպքի համար։ Նրան առաջադրված բոլոր մեղադրանքներով նրան սպառնում է 175 տարվա ազատազրկում։ Նոյեմբերին արևմտյան առաջատար հրատարակությունները, ներառյալ The New York Times-ը, The Guardian-ը, The Times-ը, Le Monde-ը և El País-ը, կոչ էին արել ԱՄՆ կառավարությանը հանել Ասանժի դեմ մեղադրանքները:
դեպի ետ