14.05.2021«ՊԵՏՔ Է ՎԵՐԱՆԱ ՆԻԿՈԼԻԶՄԸ` ԻՐ ՀԵՏ ՏԱՆԵԼՈՎ ԱՆԳՐԱԳԵՏ, ԱՆՀԱՅՐԵՆԻՔ ԵՎ ԹՐՔԱԲԱՐՈ ԵՐԵՎՈՒՅԹՆԵՐԻՆ». Գայանե Ասլամազյան
Երկրում տիրող իրադարձությունների մասին "Իրավունքը" զրուցեց հաղորդավարուհի ԳԱՅԱՆԵ ԱՍԼԱՄԱԶՅԱՆԻ հետ:
– Բնակվում եք ԱՄՆ-ում եւ բավականին ակտիվ հետեւում եք հայաստանյան իրադարձություններին: Ինչպե՞ս եք վերաբերվում երկրում ստեղծված նախընտրական պայքարին:
– Քանի որ հեռու եմ ապրում, եւ ժամերս այլ են, մոտ երեք տարի է ինձ մոտ օր ու գիշեր խառնվել է: Նախօրեին շատ մռայլ էի եւ սպասումներով լի: Այդ գիշերը շատ կարճ տեւեց… Արթնանալուն պես միանգամից միացրի երկրորդ նախագահի ելույթը: Շատ հուզվեցի հենց առաջին վայրկյաններից, երբ հնչեց մեր հիմնը, եւ տեսա գեղեցիկ տեղադրված մեր դրոշները: Հասկացա, որ երեք տարիների ընթացքում որքան էլ որ ուշադիր հետեւել եմ լրահոսին, չեմ լսել մեր հիմնը եւ չեմ տեսել լուրջ մոտեցում յուրաքանչյուր ելույթի: Պետականության հանդեպ ճիշտ մոտեցում, մտածողություն, հարգանք մեր պետական նշանների նկատմամբ: Հոգնել եմ հիստերիկ մեղադրանքներից ու քանդուքարափ անող գաղափարներից: Հոգնել եմ փողոցային փնթի վիճակից, որ տիրում է արդեն երեք տարի: Մենք երեք տարվա մեջ չենք լսել գեթ մեկ կառուցողական միտք: Վերջապես հստակ ծրագիր, գործ անելու տրամադրվածություն: Հավանեցի մարդկանց հրապարակում: Եվ այն փաստը, որ մարդկանց չէին օգտագործել ինչպես նախկինում. "Դուք գնացեք 8-ից հրապարակ, ես 11-12-ին կգամ": Կարճ, կոնկրետ եւ դեպի ծանրագույն աշխատանքը տանող խոսք: Առանց փողկապ, շապիկի թեւերը վեր բարձրացրած եւ անշնորհակալ աշխատանքին լծվելու պատրաստություն: Հոգումս առաջին անգամ հույսի լույս ծագեց: Եվ այդ զգացողությամբ, լավ տրամադրությամբ սկսվեց իմ օրը` հետհաշվարկով: Ես սատարում եմ բանիմաց, գործունյա մասնագետներին, որոնք առաջին հերթին սիրում են իրենց երկիրը եւ հայ լինելը: Ովքեր հասկանում են աշխարհի կողմից մեզ նետված քաղաքական միտումները եւ գիտեն ինչպես կասեցնել կամ շրջանցել դրանք: Ինձ համար կապ չունի, որ դաշինքից կամ կուսակցությունից են: Կարեւորը, որ փորձն ու գիտելիքը վերացնի, արմատախիլ անի նիկոլիզմը` իր բոլոր դրսեւորումներով: Ասել, որ միայն Նիկոլը պետք է հեռանա, սխալ է: Պետք վերանա նիկոլիզմը` իր հետ տանելով անգրագետ, անհայրենիք եւ թրքաբարո երեւույթներին, տեղը զիջելով խելացի, փորձառու մասնագետներին:
– Լեւոն Տեր-Պետրոսյանի առաջարկին ինչպե՞ս եք վերաբերվում: Իր հոգեզավակի դեմ դուրս գալը, ըստ Ձեզ, ինչո՞վ էր պայմանավորված:
– Ես հիշում եմ Լեւոն Տեր-Պետրոսյանի կառավարած տարիները, թե ինչպես այդ մարդը վերացրեց մեր ազգի սերուցքը, եւ դա արդարացի կոչում էին սպիտակ գենոցիդ: Ինչպես նա կրկին ցնցումների ենթարկեց մեր երկիրը եւ մարտի 1-ին հանգիստ թեյ էր խմում իր տանը: Նա սասանեց մեր դիրքերը միջազգային հարթակներում: Ինչպես ստեղծեց Նիկոլ կոչեցյալին եւ աշխատեցրեց իբրեւ ռեսուրս իրենից հետո եկած իշխանությունների դեմ: Գուցե կան բաներ, որ նա էլ չէր սպասում իր աշակերտից, բայց վատ է այն ուսուցիչը, որին չի գերազանցում աշակերտը: Ես այդ մարդու ոչ մի քայլի չեմ հավատում: Եվ համարում եմ, որ նա հայանպաստ աշխատանքի ունակ չէ: Լեւոն Տեր-Պետրոսյանի ծրագրերի իրականացմանը հիմա ներկա ենք: Եվ դա արվում է Նիկոլի ձեռքերով: Ես շատ լավ եմ հիշում բոլոր երեք նախագահների ղեկավարման տարիները: Ինձ թվում էր, որ միակ մարդը, ում ես իսկապես չեմ ընկալել, դա Լեւոն Տեր-Պետրոսյանն էր: Բայց հիմա ես հասկացա եւ զգացի, թե ինչ է իրականում նողկանք ապրելը: Նիկոլի անհայրենիք տեսակը երբեք չպետք է երկրի ղեկին լինի: Դա անթույլատրելի է: Եվ այդ անհրաժեշտությունը բխում է մեր ազգի շահերից: Պետք է կրկին ոտքի կանգնենք եւ թույլ չտանք, որ մեզ վերացնեն, վերացնելով մեր պետությունը, կրոնը, գիտությունը, կրթությունը եւ մարդկանց ճիշտ որակը: Պետք է վերջ դրվի նիկոլիզմին:
Նունե Զաքարյան
www.iravunk.com
դեպի ետ